BeNeLux-Kazakhstan Trade Talks 2025: қазақстандық экспорттаушылар үшін жаңа мүмкіндіктер

BeNeLux-Kazakhstan Trade Talks 2025: қазақстандық экспорттаушылар үшін мүмкіндіктер көкжиегін кеңейту

Астана, 2025 жылғы 18 наурыз — Астанадағы Мақсұт Нәрікбаев атындағы университетте (MNU) өткен «BeNeLux-Kazakhstan Trade Talks 2025» дөңгелек үстелі мемлекеттік құрылымдардың, бизнестің және сауда саласындағы сарапшылардың өкілдерін экономикалық байланыстарды нығайту және Қазақстан мен Бенилюкс өңірі арасындағы жаңа экспорттық мүмкіндіктерді зерделеу үшін біріктірді.

БеНиЛюкс Сауда палатасы мен QazTrade ұйымдастырған іс-шара экспортты жеделдету мәселелерін, қаржылық қолдау тетіктерін және Бенилюкс елдерінің нарықтарына шығу стратегияларын талқылау алаңына айналды.

Сөзінде QazTrade басқарушы директоры Айнур Амирбекова шағын және орта бизнесті (ШОБ) жаһандық өндірістік-өткізу тізбектеріне интеграциялауға бағытталған мемлекеттік бастама — Экспортты жеделдету бағдарламасын таныстырды.

«Біздің мақсатымыз — қазақстандық кәсіпорындарға идеядан іске асыруға дейінгі барлық кезеңдерде жан-жақты қолдау көрсету. Экспортты жеделдету бағдарламасы кәсіпорындарды диагностикалауды, нарықтарға шығу стратегияларын әзірлеуді, B2B-кездесулерді ұйымдастыруды, сондай-ақ халықаралық сауда көрмелеріне қатысу мен өнімді сертификаттауға қаржылық қолдауды қамтитын қызметтер кешенінен тұрады», — деп атап өтті Айнур Амирбекова.

БеНиЛюкс Сауда палатасының Бас директоры Арман Кумисбаев қазақстандық және еуропалық компаниялар арасында байланыс орнатудың, сондай-ақ экспорттаушылардың Бенилюкс елдерінің нарықтарына жайлы шығуын қамтамасыз етудің маңыздылығын атап өтті.

«Біздің Палата қазақстандық кәсіпорындар мен Бенилюкс елдері арасындағы байланыстырушы буын болып қызмет етіп, нарықтар туралы маңызды ақпарат, нормативтік-құқықтық мәселелер бойынша консультациялар және негізгі сауда желілеріне қолжетімділік ұсынады. Алдағы бастамалар аясында біз 4–5 маусымда Қазақстанның Бельгияға көпсалалы Сауда миссиясын, содан кейін IT-компаниялар үшін Люксембургке іскерлік бағдарлама ұйымдастырамыз. Бұл іс-шаралар қазақстандық компанияларға еуропалық іскерлік серіктестермен тікелей байланыс орнатуға мүмкіндік береді», — деді Арман Кумисбаев.

IGK Group Kazakhstan директоры Артём Толстов экспорттаушылардың тәуекелдерін басқару мен қаржылық қауіпсіздігінің маңыздылығы туралы айтып берді. «Жаһанданған экономика жағдайында компаниялар қаржымен, төлемдердің кешігуімен және серіктестердің сенімділігімен байланысты өсіп келе жатқан тәуекелдерге тап болады. IGK Group-та біз қаржылық қорғаудың кең спектрін ұсынамыз — сауда кредиттерін сақтандырудан бастап контрагенттердің төлем қабілеттілігін бағалауға, сенімділікті тексеру және берешекті өндіріп алу қызметтеріне дейін», — деп атап өтті Артём Толстов.

Іс-шара нетворкинг сессиясымен аяқталды, бұл жаңа іскерлік байланыстар орнатуға және халықаралық сауда саласындағы ынтымақтастықты нығайтуға ықпал етті.