ҚР Премьер-Министрі Әлихан Смайылов төрағалық еткен «Қазақстан-Еуроодақ» диалог алаңдасының 13-отырысы

Астанада ҚР Премьер-Министрі Әлихан Смайылов төрағалық еткен «Қазақстан-Еуроодақ» диалог алаңдасының 13-отырысы өтті. Іс-шараға орталық мемлекеттік органдардың бірінші басшылары, дипломатиялық корпус пен бизнес өкілдері қатысты.

Отырыста республиканың салық және кеден жүйелерін жетілдіру, фармацевтика өнеркәсібін, геологиялық барлауды және аграрлық индустрияны дамыту, лицензиялау, кредиттеу және бизнесті қолдау, экспорттық-импорттық операцияларды жүргізу кезіндегі жүктемені азайту, сондай-ақ бірқатар басқа мәселелер егжей-тегжейлі талқыланды.

Сөзінде Премьер-Министр бүгінгі күні Еуропалық Одақтың Қазақстанның ірі сауда және инвестициялық серіктесі болып табылатынын атап өтті. Еуропалық инвестициялардың жалпы көлемі 175 миллиард доллардан асты. Атап айтқанда, 6 ай ішінде ЕО елдері ҚР экономикасына 5,2 миллиард доллар инвестиция салды.

«Қазақстанның сыртқы саудасында ЕО-ның үлесі шамамен 30%-ды құрайды. 10 ай ішінде тауар айналымымыз 34 миллиард доллардан асты. Бұл көрсеткіштер сауда-экономикалық ынтымақтастықты ұлғайтуға бағытталған біздің дәйекті бағытымызды көрсетеді», — деді Әлихан Смайылов.

Ол бүгінде ҚР экономикасының түрлі салаларында Shell, Eni, Air Liquide, Alstom және Claas сияқты ірі трансұлттық корпорацияларды қоса алғанда, 3 мыңнан астам еуропалық компания табысты жұмыс істеп жатқанын қосты.

«Бұл жыл инвестициялық өзара іс-қимылды дамытуда өте нәтижелі болды. Біздің бірлескен қорымыз жаңа ірі жобалармен толығуда. Svevind компаниясының жасыл сутегі өндірісі жобасын іске асыруы, Total компаниясымен қуаты 1 ГВт жел электр станциясын салу туралы келісім жасасуы, Knauf компаниясының гипскартон өндіретін 4-ші зауыт ашу жоспарлары, сондай-ақ Scania компаниясының көлік құралдарын ірі тораптап құрастыруды іске қосуы соның айқын мысалдары болып табылады», — деп мәлімдеді Үкімет басшысы.

Оның сөзінше, еуропалық компаниялардың Қазақстандағы қатысуын кеңейту үрдісі республиканың инвестициялық тартымдылығының артып келе жатқанының тікелей растамасы болып табылады.

Бизнес үшін қолайлы жағдай жасау және инвестициялық ахуалды жақсарту Үкіметтің басым міндеттерінің бірі болып қала беретіні атап өтілді.

«Біз сапалы әрі ұзақ мерзімді инвестициялардың келуі үшін ең қолайлы жағдай жасауға ұмтыламыз. Ол үшін нормативтік-құқықтық база мен инвестицияларды қолдау құралдары озық әлемдік стандарттарға сәйкес үнемі жетілдіріліп отырады», — деп атап өтті Әлихан Смайылов.

Премьер-Министр Қазақстанда ESG стандарттарын ескере отырып, 2026 жылға дейінгі Инвестициялық саясат тұжырымдамасы қабылданғанын еске салды. Жобаларды сапалы инфрақұрылыммен қамтамасыз ету үшін 2029 жылға дейінгі Ұлттық инфрақұрылым жоспары әзірленуде. Жаңа Салық кодексі аясында әкімшілендірудің сервистік моделі енгізілетін болады.

«Инвесторлардың мемлекеттік қызметтерді алу және жобаларды сапалы сүйемелдеу ыңғайлылығы үшін Ұлттық цифрлық инвестициялық платформасы әзірленуде», — деді Әлихан Смайылов.

Оның сөзінше, жалпы алғанда, ҚР Үкіметі қолайлы инвестициялық ахуал қалыптастыруға бағытталған дәйекті мемлекеттік саясатты жалғастыратын болады.

Дереккөз: primeminister.kz