Брюссельде Бельгия мен Қазақстан арасындағы жаңа бизнес мүмкіндіктері талқыланды

Брюссель, 2025 жылғы 4 маусым — Beci – Brussels Chamber of Commerce бас кеңсесінде Бельгия — Қазақстан Іскерлік кеңесінің үшінші отырысы өтті, бұл екі ел арасындағы экономикалық байланыстарды нығайтудағы маңызды қадам болды.

Іс-шараны Қазақстандағы БеНиЛюкс Сауда Палатасы BECI, Belgian Chambers, сондай-ақ экспорт пен инвестицияларды қолдау жөніндегі өңірлік агенттіктер — AWEX, Flanders Investment & Trade және hub.brussels қолдауымен ұйымдастырды. Отырыс екіжақты ынтымақтастықты нығайтуға мүдделі мемлекеттік құрылымдардың, іскерлік бірлестіктер мен жеке сектордың өкілдерін біріктірді.

Қатысушыларға құттықтау сөздерімен BECI бас директоры Тьерри Геертс, Бельгияның Қазақстандағы Елшісі мырза Анри Вантигем, Қазақстанның Бельгиядағы Елшісі мырза Мәрғұлан Баймұхан, Қазақстандағы БеНиЛюкс Сауда Палатасының Президенті мырза Денис Ван ден Вейх және Қазақстанның Сыртқы сауда палатасының Төрағасы мырза Мұрат Кәрімсаков сөз сөйледі. Олар тұрақты іскерлік диалогтың маңыздылығын және сыртқы экономикалық байланыстарды дамытудағы жеке сектордың рөлін атап өтті.

Сауда мен инвестициялар перспективаларына арналған панельдік талқылау аясында өзекті трендтер мен қолдау құралдарын таныстырған жетекші өңірлік агенттіктердің өкілдері — Ив Ришар (AWEX), Джон Верзеле (FIT) және Арне Артбелиен (hub.brussels) сөз сөйледі. Ahlers Logistics компаниясының бизнес-бөлімше директоры Дидье Дюпонсель компанияның Қазақстандағы жұмыс тәжірибесімен бөлісіп, логистикалық сенімділік пен жергілікті қатысудың рөлін атап өтті. Панельді Artex Holding холдингінің акционері әрі Бельгияның Маңғыстау облысындағы Құрметті консулы Мұртаза Арифов түйіндеп, серіктестікті дамытуға бизнес тұрғысынан практикалық көзқарас таныстырды.

Іс-шараның екінші бөлігінде екіжақты ынтымақтастықты кеңейтуге бағытталған институционалдық тетіктер талқыланды. «Байтерек» холдингі басқарма төрағасының орынбасары Тимур Оңжанов, Credendo экспорттық-кредиттік агенттігінің өкілі Уим Босман, «Қазақстанның экспорттық-кредиттік агенттігі» АҚ департамент директоры Асхат Абай және Pravolex заң фирмасының серіктесі, Қазақстанның Валлон Брабантындағы Құрметті консулы Анна Суссарова қаржыландыру, экспорттық тәуекелдерді сақтандыру және сыртқы сауда келісімшарттарын заңгерлік сүйемелдеу мәселелерін ашып көрсетті.

Қазақстаннан келген сауда миссиясының қатысушылары — New Generation, Emerging Markets Group, Batys WoodWorks Production, Artex Holding және Astana NAN компаниялары өз жобаларын таныстырып, жоғары экспорттық және инвестициялық әлеуетін көрсетті. Олардың қатысуы кеңестің практикалық бағытын және бельгиялық серіктестермен тікелей іскерлік байланыс орнатуға деген қызығушылықты растады.

Отырыстың Брюссельде өтуі Іскерлік кеңесі форматының Бельгия мен Қазақстан арасындағы экономиканың негізгі салаларындағы өзара тиімді серіктестікті ілгерілету мен ынтымақтастықты кеңейтудің тиімді алаңы ретіндегі өзектілігін растады.