Люксембургтың ҚР-ға сауда миссиясы

2023 жылғы 2 қазанда Алматы қаласында қазақстандық-люксембургтық бизнес-форум өтті, оған осы жылғы 2–6 қазан аралығында Сауда миссиясы аясында Қазақстанға келген люксембургтық АКТ, High Tech, өнеркәсіп және қаржы компаниялары қатысты.

Іс-шараның бас ұйымдастырушысы Люксембург Сауда палатасы болды, ал Форум мен Сауда миссиясының үйлестірушілері — ҚР-дағы БеНиЛюкс Сауда Палатасы мен Люксембургтегі ҚР Елшілігі болды.

Бизнес-форумның негізгі тақырыбы — IT, цифрландыру, қаржы қызметтері, білім беру, көлік, тау-кен өндіру және экология секторы сияқты басым бағыттарда екі елдің ынтымақтастығын кеңейту мәселелері болды. Бұл іс-шара Қазақстандағы бизнестің дамуының соңғы үрдістерін білуге және Люксембургтен келген әлеуетті іскерлік серіктестермен кездесуге тамаша мүмкіндік болды.

Бизнес-форумға Люксембург пен Қазақстанның ресми және іскерлік топтарының өкілдері қатысты: Люксембургтің Қазақстан Республикасындағы Елшісі мырза Том Райзен, Люксембург Сауда Палатасының Президенті мырза Фернан Эрнстер, ҚР-дағы БеНиЛюкс Сауда Палатасының Президенті мырза Денис Ван ден Вейх, Алматы қаласы Кәсіпкерлік және инвестициялар басқармасының басшысы мырза Берік Солтанбаев, «Kazakh Invest» ҰК» АҚ Еуропа елдері бойынша өңірлік директоры ханым Алтынай Мұқанова, «Атамекен» кәсіпкерлер палатасының Алматыдағы директорының міндетін атқарушы ханым Айнұр Баспақова, Алматы қаласындағы АТП АЭА Бас директорының орынбасары мырза Азамат Төлебаев, экономиканың түрлі салаларынан бірқатар қазақстандық компания, сондай-ақ сауда миссиясына қатысушы люксембургтық компаниялардың басшылары мен өкілдері — Data things, MTX Connect, Pure Lambda, Virtual Rangers, LOBOX Architectes және басқалар.

Іс-шара шамамен 60 қатысушыны жинады, олардың арасында 14 люксембургтық компанияның өкілдері болды. Миссия аясында БеНиЛюкс Сауда Палатасы Алматы мен Астана қалаларында шамамен 50 екіжақты кездесу ұйымдастырды, олардың нәтижесінде серіктестік туралы нақты уағдаластықтарға қол жеткізілуі күтілуде.