Қазақстан Бельгия мен Нидерландпен жан-жақты ынтымақтастықты кеңейтуге ниетті

Астана, 2024 жылғы 6–7 ақпан — ҚР Сыртқы істер вице-министрі Роман Василенко Бельгия мен Нидерландының ҚР-дағы Елшілері Анри Вантигем және Нико Схермерспен кездесулер өткізді.

Бельгиялық дипломатпен әңгіме барысында екі елдің саяси диалогын одан әрі нығайту, экономикалық және сауда байланыстарын жандандыру мәселелері талқыланды. 2023 жылы құрылған екіжақты Іскерлік кеңестің сауда-инвестициялық өзара іс-қимылды ұлғайтудағы оң рөлі атап өтілді.

Вице-министр Бельгияны Еуропалық Одақ Кеңесінде төрағалық етудің басталуымен құттықтап, ҚР азаматтары үшін виза режимін жеңілдету мәселесін ілгерілету жөнінде белсенді бірлескен күш-жігерге үміт артатынын білдірді.

Нидерланд дипломатымен кездесуде сауда-инвестициялық ынтымақтастықты күшейтуге, ауыл шаруашылығы, су ресурстарын басқару және басқа да өзекті бағыттардағы өзара іс-қимылға деген өзара қызығушылық атап өтілді.

Тараптар өткен жылдың соңында құрылған, өзара тиімді серіктестікке жаңа серпін беруге арналған қазақстан-нидерланд бірлескен ауыл шаруашылығы комитетінің жұмысын қолдауға дайын екенін білдірді.

Р.Василенко әңгімелесушілерін Қазақстан мен Еуропа арасындағы сауда-экономикалық өзара іс-қимылды кеңейтудің жаңа перспективаларын ашатын Транскаспий халықаралық көлік бағытын бірлесіп дамытуға шақырды.

Кездесулер барысында өңірдегі ынтымақтастық мәселелеріне, оның ішінде осы жылы Астанада өтетін Орталық Азия мемлекет басшыларының VI консультативтік кездесуін дайындау контекстінде ерекше назар аударылды. Р.Василенко әңгімелесушілерін Қазақстанның қоршаған ортаны қорғау, су ресурстары және басқа да салалардағы өңірлік өзара іс-қимылды нығайту жөніндегі бастамалары туралы хабардар етті. Ол сондай-ақ озық еуропалық тәжірибені ескере отырып, қазақстандық тараптың өңірде бірлескен жобаларды іске асыруға дайын екенін білдірді.

Анықтама үшін: Бельгия — Қазақстанның ЕО-дағы маңызды сауда серіктесі. 2023 жылдың қорытындысы бойынша екіжақты сауда айналымы 523,7 млн АҚШ долларын құрады (экспорт — 220,7 млн, импорт — 303 млн). 2005 жылдан бері Бельгиядан Қазақстанға инвестициялардың жалпы ағыны 12,4 млрд АҚШ долларын құрады.

Нидерланды Қазақстанның Еуропадағы ең ірі бес сауда серіктесінің қатарына кіреді. 2023 жылы елдер арасындағы тауар айналымы 4,4 млрд АҚШ долларын құрады (экспорт — 4 млрд, импорт — 400 млн). 2005 жылдан бері Нидерланды Корольдігінен ҚР-ға тікелей инвестициялар көлемі шамамен 117,7 млрд АҚШ долларын құрады.